النايمين*********

النايمين
يا النايمين نعسو او زيدو في النعاس
و الله وما كان القفال لا طلع لفار في الكسكاس
غطاوكم بتوب حرير و عجبكم في اللباس
شربوكم حبوب التنويم خلاو فيكم بو هلواس
كثرو عليكم بالتخدير حتى نساوكم صداع الراس
حرموكم من التفكير و حيدو ليكم الوسواس
صبحتو سارحين بلا تدبير حتى ما بقيتو تعرفو لا بالة و لا فاس
و نعسو يا النايمين او زيدو في النعاس

لبحر اليوم راه هاج
وشحال كثرو فيه لمواج
رودو بالكم راه هداك الطوفان لا تبقاوش عاطينها لتفراج
و قفضو على دراعيكم قبل لا ظهركم يعواج
حيث البر ما بقا ليكم فيه بروك و شحال كثر فيه د لعجاج
وشبابو ما تعول عليه راه صبح مخدر ويقاقي كيف الدجاج
و تقول جربو فيه سحور وصبح من بلادو عا طاج

رحال اودغوغ